Ҳайбатуллоҳ Охундзода. thesun.co.uk сайти фотосурати
Афғон толиблари етакчиси* Ҳайбатуллоҳ Охундзода Афғонистонда йўқ бўлган ва мамлакатда коррупцияда айбланган фуқароларга тегишли кўчар ва кўчмас мулкларни мусодара қилиш тўғрисида фармон чиқарди, деб хабар беради Khaama Press.
Маъмурий ишлар бошқармаси қошидаги Мулкни текшириш департаменти тугатилади ва унинг вазифалари Олий суднинг ҳарбий ўринбосарига ўтказилади.
Ҳарбий судларга эмигрантлар ва коррупцияда айбланганлар билан боғлиқ мулк ишларини текшириш ваколати берилган. Улар йўқ бўлган шахсларнинг кўчар ва кўчмас мулкларини улар қайтиб келгунга қадар мусодара қилади, ажратади, таҳлил қилади, сақлайди ва улардан фойдаланади. Коррупцияда айбланганларнинг мулки ҳам мусодара қилинади.
Ҳозирда собиқ ҳукумат амалдорлари ва чет элда яшовчи толиблар мухолифларининг мулки ва активлари амалдаги маъмурият назорати остида.
Khaama Press таъкидлашича, мол-мулкни мусодара қилиш толиблар учун назоратни мустаҳкамлаш ва душман деб ҳисобланганларни жазолаш воситасига айланган. Хориждаги минглаб афғонлар ўз мулкларининг мусодара қилинишига қарши чиқа олмайдилар. Бугунги кунда Афғонистонда шаффоф ҳуқуқий процедуралар, мустақил суд назорати ва апелляция механизмларининг йўқлиги мулк эгаларининг мусодара қилишга қарши деярли ҳеч қандай чора кўролмасликларини англатади. Толибларнинг «коррупция» ва «шахснинг мамлакатда йўқлиги» таърифлари ноаниқ ва ўзбошимчалик билан талқин қилиниши мумкин.
2021 йил август ойида ҳокимиятни эгаллаб олганидан бери ҳукмрон режим собиқ ҳукумат амалдорлари, хавфсизлик кучлари ва мухолифат арбобларини мунтазам равишда таъқиб қилиб келади. Кўпчилик таъқиблардан қўрқиб, мамлакатни тарк этган. Халқаро инсон ҳуқуқлари ташкилотлари собиқ ҳукумат ёки халқаро кучлар билан ишлаган шахслар мулкларини оммавий мусодара қилиш, одамларни бошқа жойга мажбурий кўчириш ва активларини ўзбошимчалик билан мусодара қилиш ҳолатларини ҳужжатлаштирган.
*Кўпгина мамлакатларда террорчи сифатида тан олинган ва тақиқланган ташкилот.
