Идиш. ИЦМ матбуот хизмати фотосурати
VII–VIII асрларга оид қанотли туя тасвирланган кумуш идиш Санкт-Петербургдан Ўзбекистонга қайтарилди ва Тошкентдаги Ислом цивилизацияси маркази музейида намойиш этилмоқда. Бу ҳақда Марказ сайтида хабар берилди.
Артефакт Исломгача бўлган давр зали кўргазмалари қаторидан ўрин олди. Идиш илк Ўрта асрлардаги металлга бадиий ишлов бериш санъатининг энг қимматли намуналаридан бири ҳисобланади. V–VIII асрларда Марказий Осиёда металл буюмларни куч, ҳимоя ва фаровонликни рамзини ифодаловчи ҳайвонлар ва мифологик мавжудотлар тасвирлари билан безаш кенг тарқалган бўлган.
Марказий образ — қанотли туя — ҳақиқий ва мифологик дунё синтезини ўзида акс этади ва карвон савдоси ва Буюк Ипак йўли билан боғлиқлигини намоён этади.
Мутахассисларнинг фикрига кўра, бу асар Сўғд торевтикаси юқори даражада ривожланганидан дарак беради. Безаклар пухта ишланган, композиция мувозанатли ва фигура ҳаракат туйғусини ифодалайди. Бундай кумуш буюмлар илк ўрта асрларда халқаро савдода фаол иштирок этган, шунинг учун топилмаларнинг катта қисми улар яратилган минтақа ташқарисида топилган.
ℹ️ Ислом цивилизацияси маркази Хасти-Имом мажмуаси ёнида қурилмоқда. Иншоот қадимги меъморий обидалар шаклида бунёд этилмоқда. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Марказнинг энг асосий қисмида Қуръони карим зали бунёд этилмоқда. Бу ерда 460 ўринли анжуманлар зали ҳам қуриб битказилди. ИЦМ Ўзбекистон халқаро исломшунослик академияси ва дунёнинг ихтисослаштирилган илмий-таълим марказлари билан ҳамкорликда аждодлар меросини ўрганиш, идрок этиш борасида маърифий масканга айланиши кўзда тутилган.
