Голамреза Шокроб. iranhr.net фотосурати
Эронда Исроил разведка агентлиги Моссад билан ҳамкорлик қилишда айбланган собиқ ММА жангчиси Ғоламреза Ҳани Шокраб қатл этилди. Бу ҳақда Tasnim агентлигига таяниб, Reuters хабар берди.
Эрон расмийларининг маълумотларига кўра, Шокраб Исроил разведка тармоғи билан боғлиқ бўлиб, мамлакат ичида одамларни ёллаган ва уларга Моссад топшириқларини топширган. Унга гўёки молиявий низо ниқоби остида Теҳронда бир кишига ҳужум уюштириш вазифаси топширилган.
Эрон оммавий ахборот воситалари Шокрабни Исроил разведкасининг «тармоқ раҳбари» деб атамоқда ва ҳукм Олий суд томонидан тасдиқлангани ва суд жараёни тугагандан сўнг амалга оширилгани ҳақида хабар бермоқда.
Инсон ҳуқуқлари фаоллари ва мустақил Эрон оммавий ахборот воситалари бошқача версияни тақдим этишмоқда. Iran International ва Iran Human Rightsга кўра, Ғоламреза Ҳани Шокраб Ардабиллик собиқ ММА спортчиси, мураббий ва ҳакам бўлган. Ҳибсга олинишидан олдин у Туркияда яшаган. Инсон ҳуқуқлари фаоллари унинг иши ёпиқ режимда кўрилгани, унинг иқрорлиги эса мажбуран олингани бўлиши мумкинлигини даъво қилишади.
Унинг қатл этилишидан бир неча кун олдин, Iran Human Rights ташкилоти Шокрабнинг Эвин қамоқхонасидан Гезел Ҳесар қамоқхонасидаги якка тартибдаги камерага ўтказилганини хабар қилган, бу одатда ўлим жазоси ижро этилишидан олдин қўлланиладиган процедура ҳисобланади.
Шокрабнинг жосуслик айбловлари очиқ манбаларда мустақил тасдиқланмаган. Иш тафсилотлари Эрон ҳукумат идораларидан ёки миллий хавфсизлик ишларида ёпиқ суд жараёнлари ва мажбурий иқрорномалар амалиётини танқид қилувчи инсон ҳуқуқлари ташкилотларидан келмоқда.
Шокрабнинг қатл этилиши Эрон ва Исроил ўртасидаги кескинлик кучайган бир пайтда содир бўлди. Сўнгги йилларда Эрон расмийлари Исроил разведка идоралари билан ҳамкорлик қилганликда айбланган одамларнинг ҳибсга олингани ва қатл этилгани ҳақида бир неча бор хабар беришган.
