Эмомали Раҳмон 16 июнь куни амнистия тўғрисидаги қонунни имзолаганидан сўнг, бир қатор ҳукм қилинган тожик журналистлари ва блогерларининг жазо муддатлари уч йилга қисқартирилди. Бу ҳақда «Азия-Плюс» хабар берди.
Нашр мухбирлари жамоатчилик эътиборига тушган ишлар бўйича фигурантларнинг яқинлари билан суҳбатлашиб, ҳар бир ҳолатда жазо муддати қанчалик қисқарганини аниқлашган. Суҳбатдошлар амнистия ҳақидаги маълумотни исмлари ошкор этилмаслиги шарти билан тасдиқлашган. Тожикистон ҳукумати ҳозирча амнистия қилинган маҳбусларнинг айнан қачон озод этилиши бошланишини расман эълон қилмаган. Бироқ, қонунни ижро этиш учун икки ой муддат белгиланган.
Амнистияга тушганлар орасида журналист аёл Рухшона Ҳакимова ҳам бор. Яқин қариндошининг маълум қилишича, унинг жазо муддати 3 йилга қисқартирилган. Эслатиб ўтамиз, Ҳакимова ЖК 305- модда (“Давлатга хиёнат”) бўйича айбланиб, 2025 йил 5 февралда 8 йиллик қамоқ жазосига ҳукм қилинган эди. У ҳозир қамоқда қарийб бир ярим йилдан бери сақланмоқда. Амнистияни ҳисобга олганда, унга яна 3,5 йилдан кўпроқ муддат қолмоқда.
Журналист Абдулло Гурбатийнинг жазо муддати ҳам уч йилга қисқартирилади.
«Абдулло амнистия ҳужжатларини имзолади ва 2026 йил 24 декабрда озодликка чиқади», — деб аниқлик киритади журналистнинг қариндошларидан бири.
Ғурбатий 2022 йил 15 июнда ҳибсга олинган. У Жиноят кодексининг учта моддаси бўйича етти ярим йилга озодликдан маҳрум қилинган: 328 (“Давлат амалдорига нисбатан зўравонлик ишлатиш»), 330 («Давлат амалдорини ҳақорат қилиш») ва 307 («Экстремистик жамоани ташкил этиш»).
Блогер Далер Эмомали жазоси ҳам 3 йилга қисқартирилади. У 2022 йил 15 июнь куни, Абдулло Ғурбатий билан бир кунда ҳибсга олинган. Эмомали 259 («Ноқонуний тадбиркорлик»), 346 (»Қасддан ёлғон маълумот бериш») ва 307-моддалар бўйича айбланган. Суд уни 10 йилга озодликдан маҳрум қилганди. У тўрт йил қамоқда ўтирган ва амнистия бўйича яна уч йилу тўрт ойдан сўнг озод қилинади.
Қариндошларининг сўзларига кўра, Завқибек Саидамини озод қилиниши мумкин.
“Завқибек амнистия ҳужжатларини имзолади ва қамоқда ўтказган йилларини ҳисобга олган ҳолда, шу йилнинг 18 июлида озодликка чиқади», — дейди блогернинг қариндошларидан бири “Азия-Плюс” нашрига. Саидамини 2022 йил 8 июлда ҳибсга олинган ва ўша йилнинг 3 ноябрида 307-модда бўйича етти йилга озодликдан маҳрум қилинган.
Абдусаттор Пирмуҳаммадзоданинг тақдири ҳали ҳам номаълум. У 2022 йил 9 июл да ҳибсга олинган ва 307-модда бўйича етти йилга озодликдан маҳрум қилинган. Агар унга амнистия қўлланилса, у ҳам июль ойининг бошида озод қилиниши мумкин.
Журналист Хуршед Фозиловнинг жазо муддати ҳам уч йилга қисқартирилган. У 2023 йил март ойида ҳибсга олинган ва 26 май куни 307-модда бўйича етти йилга озодликдан маҳрум қилинган. Ужазонинг уч йилини ўтаб бўлди ва амнистия билан бир йилдан камроқ вақт ичида озод қилиниши мумкин.
Журналист Улфатхоним Мамадшоеванинг қариндошлари унинг амнистияга тушган-тушмаганлигини ҳали билишмайди. Эслатиб ўтамиз, Мамадшоева Тоғли Бадахшондаги норозилик намойишлари билан боғлиқ Жиноят кодексининг саккизта моддаси бўйича айбланган эди. 2022 йил декабрь ойи бошида у 21 йилга озодликдан маҳрум қилинган эди.
Амнистия Эмомали Раҳмон томонидан Тожикистон мустақиллигининг 35 йиллиги муносабати билан, 9 сентябрь куни нишонланиши арафасида эълон қилинди. У 18 мингдан ортиқ шахсга нисбатан татбиқ этилади. Жазони ижро этиш муассасалари, манзил-колониялар ҳамда жамиятдан ажратиш билан боғлиқ бўлмаган бошқа жазо турларидан 11 305 киши озод қилинади. Яна 6 733 маҳкумнинг жазо муддати қисқартирилади.
