“Йўл харитаси” имзоланиши. БМТ ТКБ матбуот хизмати фотосурати
Ўзбекистон Давлат хавфсизлик хизмати (ДХХ) ва Бирлашган Миллатлар Ташкилотининг Терроризмга қарши кураш бошқармаси (ТКБ) 2026–2027 йилларга мўлжалланган ҳамкорлик бўйича янги «йўл харитаси»ни имзолади. Томонлар, шунингдек, қатор қўшма ташаббусларни муҳокама қилдилар. Улар қаторида жанговар можаролар ҳудудларидан қайтарилган фуқаролар учун ёрдам марказини ташкил этиш масаласи ҳам бор. Бу ҳақда «Дунё» ахборот агентлиги хабар қилди.
Ўзбекистон делегациясининг халқаро тузилма вакиллари билан музокаралари Нью-Йорк шаҳрида БМТнинг Терроризмга қарши кураш ҳафталиги доирасида бўлиб ўтди. Мулоқот чоғида қуролли можаролар ҳудудларидан қайтарилган шахсларни реабилитация қилиш ва жамиятга қайта интеграциялаш бўйича Халқаро компетенциялар марказини ташкил этиш масаласига алоҳида эътибор қаратилди. Таъкидланишича, бундай марказни ташкил этиш ташаббусини Ўзбекистон президенти Шавкат Мирзиёев 2025 йил сентябрь ойида БМТ Бош Ассамблеясининг 80-сессиясида сўзлаган нутқи давомида илгари сурган эди.
ДХХ ва ТКБ вакилларининг таъкидлашича, Марказий Осиё мамлакатлари тажрибасига таянган ҳолда мазкур тузилма реабилитациянинг мослашувчан стратегияларини ишлаб чиқиш бўйича глобал билимлар майдонига айланиши мумкин. Марказ фаолияти соҳа мутахассисларни тайёрлаш ва уларнинг малакасини ошириш, репатриантлар учун таълим ҳамда касбий ривожланиш йўналишларини яратиш, шунингдек, экстремизмнинг олдини олиш ва унинг тарқалишини барвақт бартараф этишга қаратилган чора-тадбирларни ишлаб чиқишга йўналтирилиши кўзда тутилмоқда.
Томонлар Ўзбекистон ва БМТнинг Терроризмга қарши кураш бошқармаси ўртасида 2026–2027 йилларга мўлжалланган ҳамкорлик бўйича «йўл харитаси»ни имзоладилар. Мазкур ҳужжат стратегик шерикликнинг янги босқичини бошлаб бериб, Ўзбекистонга терроризмга қарши кураш соҳасида кенг кўламли эксперт ва техник кўмак кўрсатилишини таъминлайди.
Айтиш мумкинки, Давлат хавфсизлик хизмати ва БМТнинг Терроризмга қарши кураш бошқармаси ўртасидаги ҳамкорлик узайтирилди. Чунки бундан аввал ҳам 2024–2025 йилларга мўлжалланган шунга ўхшаш ҳужжат амал қилганди.
Умуман олганда, музокаралар чоғида Ўзбекистон ҳукумати ва БМТ ТКБ ўртасидаги ҳамкорликнинг ижобий суръатларда ривожланаётгани қайд этилди. Хусусан, ҳуқуқни муҳофаза қилувчи органлар ходимларининг малакасини ошириш, жангарилар томонидан янги технологиялардан фойдаланилишининг олдини олиш ҳамда терроризмни молиялаштиришга қарши курашиш бўйича қўшма дастурлар амалга оширилаётгани таъкидланди.
ℹ️ БМТнинг Терроризмга қарши кураш ҳафталиги 26 июндан 2 июлгача Нью-Йорк шаҳрида бўлиб ўтди. Ушбу тадбир БМТга аъзо давлатлар, халқаро ва минтақавий тузилмалар, шунингдек, экспертлар ҳамжамиятини бирлаштириб, замонавий таҳдидларни муҳокама қилиш ва Бирлашган Миллатлар Ташкилотининг Глобал терроризмга қарши стратегиясини амалга ошириш бўйича амалий чоралар ишлаб чиқиш учун энг нуфузли майдончалардан бири ҳисобланади.
