ИССВ матбуот хизмати фотосурати
Ўзбекистон Грузия томони билан Қора денгиздаги Грузиянинг энг йирик инфратузилма лойиҳаси ҳисобланган чуқур сувли Анаклия порти қурилишида иштирок этиш имкониятини муҳокама қилди. Бу ҳақда Ўзбекистон Инвестициялар, саноат ва савдо вазирлиги (ИССВ) матбуот хизмати хабар берди.
Ўзбекистон делегацияси Инвестициялар, саноат ва савдо вазири Лазиз Қудратов ҳамда Транспорт вазири Илҳом Маҳкамов бошчилигида Анаклия, Поти ва Батуми портлари, шунингдек, Поти эркин индустриал зонасида бўлди. Ташриф 3–4 июль кунлари президент Шавкат Мирзиёевнинг Грузияга давлат ташрифи доирасида амалга оширилди.
Анаклияда Ўзбекистон томонининг Грузиядаги энг йирик чуқур денгиз портини барпо этиш лойиҳасида иштирок этиш имкониятлари кўриб чиқилди. Қурилиш якунлангач, порт барча турдаги кемаларни қабул қилиш имкониятига эга бўлиб, халқаро транспорт йўналишларининг муҳим бўғинига айланади, жумладан Хитой–Қирғизистон–Ўзбекистон йўналиши доирасида ҳам.
Поти ва Батумида Ўзбекистон делегацияси ўзбек юклари учун омбор ва терминал инфратузилмасини жойлаштириш истиқболларини кўриб чиқди. Ташриф якунлари бўйича томонлар тегишли келишувларни тайёрлаш ва ўзбек компаниялари иштирокида консорциум тузишга келишиб олди.
Таъкидлаш жоиз, денгизга чиқиш имкониятига эга бўлмаган Ўзбекистон учун Грузиянинг Қора денгиз соҳилидаги портлари Европага юк етказиб беришнинг асосий йўналишларидан бири ҳисобланади.
ℹ️ Анаклия порти Қора денгиз соҳилидаги Самегрело–Земо Сванети минтақасида жойлашган. Бу Грузиядаги биринчи чуқур сувли порт бўлиб, барча турдаги кемаларни қабул қилиш имкониятига эга. Анаклия кўрфазининг чуқурлиги 20 метрга етади, бу эса амалдаги Батуми (14 метр) ва Поти (8,5 метр) портларига нисбатан анча чуқур ҳисобланади. Лойиҳани амалга ошириш учун хусусий инвесторни танлаш бўйича ўтказилган тендерда China Communications Construction Company ва China Harbour Investment иштирокидаги Хитой–Сингапур консорциуми ғолиб бўлган.
Қурилиш ишлари 2024 йил сентябрь ойида бошланган. Денгиз инфратузилмасини Бельгиянинг Jan De Nul компанияси барпо этмоқда. Қиймати тахминан 600 миллион АҚШ долларига тенг бўлган биринчи босқични 2029 йилдан кечиктирмай якунлаш режалаштирилган. Биринчи навбат ишга туширилгач, портнинг қуввати йилига 600 мингдан ортиқ контейнерни қабул қилиш имконини беради.
