Валерий Турсунов. ТФФ фотосурати
Душанбедаги «Помир» жамоасининг афсонавий ҳужумчиси, СССР спорт устаси ва Тожикистонда хизмат кўрсатган мураббий Валерий Турсунов Москва шаҳрида 72 ёшида вафот этди. Унинг вафоти ҳақида 2 август куни Тожикистон футбол федерацияси маълум қилди.
«Валерий Юлдашевич тожик футболи ривожига катта ҳисса қўшди ва мухлислар, ҳамкасблар ҳамда шогирдлар хотирасида абадий қолади», — дейилади федерация хабарида. Тожикистон футбол федерацияси президенти Рустам Эмомали Турсуновнинг яқинлари ва оила аъзоларига таъзия билдирди.
Турсунов 1954 йил 23 августда Кўлоб шаҳрида туғилган. У СССР чемпионатидаги бутун фаолиятини «Помир» жамоасида ўтказган. 1974 йилдан 1988 йилгача ҳужумчи Душанбе клуби сафида 542 та ўйин ўтказиб, 173 та гол урган ва жамоа рекордчисига айланган. Ватанида уни «тожик Пелеси» деб аташган.
Турсуновнинг ўзи бу номга босиқлик билан муносабат билдирган. У интервьюларидан бирида Пеле жаҳон миқёсидаги афсона эканини, ўзи эса деярли бутун фаолиятини бир клубда ўтказганини таъкидлаган. Шу билан бирга, ҳужумчи йиллар давомида «Помир» учун урган голларидан ҳам кўпроқ голли узатмалар амалга оширганини ҳисоблаган.
1988 йили Турсунов «Помир»га биринчи лигада ғолиб чиқиш ва СССР чемпионатининг олий дивизионига илк бор йўлланма олишда ёрдам берган. Душанбедаги кўп йиллик фаолияти якунланганидан сўнг у Австрияда қисқа муддат Клагенфуртнинг «Аустрия» ва «Клопайнерзее» жамоалари сафида тўп сурган, кейин эса мураббийлик ва маъмурий ишларга қайтган.
1996–2013 йиллар оралиғида у танаффуслар билан Тожикистон футбол федерацияси вице-президенти лавозимида фаолият юритган.
Турсуновга бир неча бор нуфузлироқ клублардан таклифлар тушган, жумладан Олмаотанинг «Қайрат», Москва ЦСКАси, Одесса «Черноморец»и ва Тошкентнинг «Пахтакор» жамоалари унга қизиқиш билдирган. У фаолиятидаги энг эсда қоларли ўйинлардан бири сифатида 1977 йили «Лужники» стадионида «Спартак»ка қарши ўтказилган учрашувни тилга олган. Ўша баҳсда у икки марта гол урган.
Футболчининг таржимаи ҳолида 1979 йили «Пахтакор»га ўтмай қолгани билан боғлиқ воқеа алоҳида ўрин тутади. Тошкентликлар сафида ўйнаган Владимир Макаров билан суҳбатдан сўнг Турсунов йиғинларга боришга рози бўлган, чақирув телеграммасини олган, чипта сотиб олган ва буюмларини тайёрлаган. Бироқ аэропортга кетаётган йўлда кутилмаганда фикридан қайтиб, уйига қайтган.
Ўшанда «Пахтакор»нинг асосий таркиби Днепродзержинск устидаги авиаҳалокатда ҳалок бўлганди.
«Демак, Яратган мени ўлимдан асраб қолган экан. Ўша ишлатилмаган чиптани узоқ вақт сақлаб юрдим», — деб эслаган Турсунов.
Валерий Турсуновнинг вафоти Тожикистон футболида 2025 йил охирида бошланган оғир йўқотишлар занжирини давом эттирди. Бирин-кетин футбол афсоналари Шариф Назаров, Мухсин Муҳаммадиев ва Владимир Гулямхайдаров ҳаётдан кўз юмди.
