Грек нефть танкери Skiros Новороссийск яқинидаги Каспий қувурлари консорциуми (КҚК) терминалида нефть юклаб олганидан сўнг Қора денгизда ҳужумга учради, деб хабар беради Bloomberg манбаларга таяниб.
Агентлик маълумотларига кўра, воқеа 16 август куни кечқурун содир бўлган. Қарийб 1 миллион баррел нефть сиғдира оладиган Suezmax тоифасидаги танкер КҚК терминалидан чиққач, ҳужумга учраган. Манбаларнинг айтишича, унга юкланган нефть партияси Россияга тегишли бўлган.
Бу КҚК терминалига кирган кемаларга қарийб уч ҳафталик «тинчлик»дан кейин содир бўлган биринчи ҳужум бўлди.
Кемани бошқарувчи компания маълум қилишича, ҳодиса натижасида ҳеч ким жабрланмаган. Шунингдек, нефть сизиб чиқиши ёки атроф-муҳит ифлосланиши кузатилмаган.
Аввалроқ, Каспий қувурлари консорциумининг денгиз терминали акваториясида танкерлар бир неча бор дронлар ҳужумига учраганди. Бунинг оқибатида нефть юклаш ишлари тўхтатилган, Қозоғистон эса углеводород қазиб олиш ҳажмини камайтиришга мажбур бўлганди.
12 август куни Financial Times манбаларга таяниб, Украина АҚШ вице-президенти Жей Ди Вэнснинг тегишли илтимосидан сўнг Новороссийскдаги КҚК терминалидан фойдаланаётган танкерларга ҳужум қилишни тўхтатганини хабар қилганди.
Нашр маълумотларига кўра, Киев КҚК инфратузилмаси ва Россияга тегишли бўлмаган кемаларга ҳужум қилмасликка рози бўлган. Бунинг учун улар Украина санкциялари остида бўлмаслиги ҳамда Россия нефти ёки юкларини ташимаслиги шарт.
ℹ️ Каспий қувурлари консорциуми Қозоғистоннинг учта йирик кони — Тенгиз, Қашаған ва Қрачиғаноқдан қазиб олинаётган нефтни Новороссийск яқинидаги денгиз терминалига етказиб беради. 2025 йилда КҚК орқали қарийб 70,5 миллион тонна нефть ташилган. Ушбу ҳажмнинг 75 фоиздан ортиғи хорижий юк жўнатувчилар ҳиссасига тўғри келган. Улар орасида энг йириклари — «Тенгизшевройл» (Chevron), ExxonMobil, «ҚазМунайГаз», Eni ва Shell компанияларидир.
