Олмаотада ҳозирда фаолиятини тўхтатган Bek Air авиакомпанияси эгаси Нурлан Жумасултанов ҳибсга олинди. У Fokker 100 самолётлари учун мўлжалланган икки двигателни ўғирлашда гумонланмоқда. Улардан бири 2019 йил декабрь ойида ҳалокатга учраган самолётга ўрнатилган эди. Бу ҳақда журналист Михаил Козачков ўзининг Telegram-каналида хабар берди.
Унинг маълумотларига кўра, Жумасултанов 9 сентябрь куни сўроқдан сўнг ушланган. Суд уни икки ой муддатга қамоққа олишга санкция берган. Унга Қозоғистон Жиноят кодексининг 188-моддаси 4-қисми — ўта йирик миқдорда ўғирлик содир этиш айби қўйилмоқда. Иш бўйича яна бир гумонланувчи уй қамоғига олинган.
Жиноят иши Олмаота аэропорти ҳудудида сақланган Fokker 100 самолётлари учун мўлжалланган икки двигателнинг йўқолиши билан боғлиқ.
Шу билан бирга, тергов 2019 йил декабрь ойида содир бўлган Bek Air самолёти ҳалокати билан бевосита боғлиқ эмас. Ўшанда Fokker 100 самолёти парвозга кўтарилиш чоғида Олмаота аэропорти ҳудудига қулаган. Ҳалокат оқибатида 15 киши ҳалок бўлган.
Козачковнинг ёзишича, ҳалокатни тергов қилиш жараёнида йўқолган двигателлардан бири ҳалокатга учраган самолётга ўрнатилгани аниқланган. Шу билан бирга, ўғирликнинг бевосита гувоҳлари ҳам, содир бўлган воқеанинг видеотасвирлари ҳам бўлмаган.
Двигателларнинг йўқолиши бўйича иш бир неча йил давомида Транспорт полицияси департаменти томонидан, жумладан, хорижий ҳуқуқни муҳофаза қилувчи органларни жалб этган ҳолда тергов қилинган. 2026 йилда Бош транспорт прокуратураси материалларни Миллий хавфсизлик қўмитасига (МХҚ) топширган. Куч ишлатар тузилмалар воқеага авиакомпания раҳбарияти вакилларининг эҳтимолий алоқадорлиги ҳақида хулосага келган. Жумасултанов сўроққа чақирилган ва шундан сўнг ушланган.
Бу маълумот расмий тасдиқланган эмас.
Ulysmedia таъкидлашича, Нурлан Жумасултанов Қозоғистон авиация соҳасида танилган шахс ҳисобланади. У бир вақтлар Қозоғистон Индустрия ва инфратузилмавий ривожланиш вазирлигининг (ИИРВ) авиация ҳодисалари ва инцидентларини тергов қилиш бошқармасига раҳбарлик қилган.
Давлат хизматига ўтишидан олдин Жумасултанов Bek Air компаниясида ишлаган. Катта шов-шувга сабаб бўлган можаро фонида вазирликдан кетганидан сўнг у яна авиакомпания тузилмасига қайтган.
ИИРВ маълумотларига кўра, аввалроқ брифингларда айтилганидек, Жумасултанов Bek Air компаниясининг ягона таъсисчиси ва акциядори бўлган.
2025 йил ноябрь ойида Олмаотанинг Турксиб туман суди мазкур авиакомпания самолёти ҳалокати бўйича иш юзасидан ҳукм чиқарган. Ҳалок бўлган икки нафар учувчи — Марат Муртабаев ва Мейржан Мулдақулов — ўшанда вафотидан кейин айбдор деб топилган. Уларга Жиноят кодексининг 344-моддаси 3-қисми («Ҳаво транспорти ҳаракати ёки ундан фойдаланиш хавфсизлиги қоидаларини бузиш, одам ўлимига олиб келган ҳолат») бўйича айблов қўйилган. Ҳалокатдан сўнг дарҳол Bek Air фаолиятини тўхтатган, 2020 йил апрель ойида эса Қозоғистон Авиация маъмурияти авиакомпаниянинг ҳаво транспорти оператори сертификатини бекор қилган.
