Қозоғистонда Каспий денгизидаги машғулотлар вақтида 14 нафар ҳарбий хизматчининг ҳалок бўлиши муносабати билан Мудофаа вазирлигининг беш нафар мансабдор шахси қўлга олинди. Қўлга олинганлар орасида Қозоғистон Ҳарбий-денгиз кучлари бош қўмондонининг биринчи ўринбосари ҳам бор. Бу ҳақда республика Ички ишлар вазирлиги матбуот хизмати хабар берди.
«Оғир оқибатларга олиб келган хизматга совуққонлик билан муносабатда бўлиш ва кемани бошқариш қоидаларини бузиш билан боғлиқ жиноий ҳуқуқбузарликларни содир этганликда гумон қилиниб, Қозоғистон Республикаси Қуролли Кучларининг юқори ва катта қўмондонлик таркибидаги масъул мансабдор шахслар қўлга олинди. Қўлга олинганлар орасида Қозоғистон Республикаси Қуролли Кучлари Ҳарбий-денгиз кучлари штаби бошлиғи — бош қўмондоннинг биринчи ўринбосари, иккита ҳарбий қисм командири, шунингдек, денгиз пиёдалари ротаси ва катер командирлари бор», — дейилади хабарда.
Гумонланувчилар Ақтау шаҳридаги вақтинчалик сақлаш изоляторига жойлаштирилган. Қозоғистон Ички ишлар вазирлиги, шунингдек, терговчи гумонланувчилардан бирига уни хизмат вазифаларига совуққонлик билан муносабатда бўлганликда гумон қилиниб қўлга олинганини маълум қилаётган видеони эълон қилган. Видеода фигурантларнинг юзлари яширилган, вазирлик хабарида уларнинг исмлари аниқлаштирилмаган.
Бироқ Elmedia нашрининг ёзишича, қўлга олинганлардан бири Ҳарбий-денгиз кучлари қўмондонининг биринчи ўринбосари Данияр Хайрушев бўлиб, у жорий йил май ойида президент Тўқаев томонидан Бауыржан Момишули номидаги II даражали «Айбын» ордени билан тақдирланган.
Шу билан бирга, Ички ишлар вазирлиги терговчилар «қўлга олиниши лозим бўлган шахсларнинг қўшимча доирасини аниқлаётганини» таъкидлайди.
Тергов версиясига кўра, фавқулодда ҳодиса Каспий денгизи соҳилидаги Ақтау шаҳридан 43 километр узоқликда бўлиб ўтган машғулотлар вақтида содир бўлган. У ерда «ноқулай метеорологик шароитда ''Қайсар'' катеридан шахсий таркибни тушириш вақтида ҳарбий хизматчилар денгизга оқиб кетган». Айни пайтда идора машғулотлар давомида фигурантлар томонидан қарорлар қабул қилиниши ҳолатларини, хавфсизлик талабларига риоя этилганини, об-ҳаво шароитлари ҳисобга олинганини ва катернинг техник ҳолатини ўрганмоқда.
Ҳодиса 24 сентябрь куни Каспий денгизининг Қозоғистон секторида Ҳарбий-денгиз кучларининг «Хазар қорғаны-2026» машғулотлари вақтида содир бўлган. Хабар қилинишича, денгизга 17 киши оқиб кетган, улардан уч нафари қутқариб қолинган. Ҳозирга келиб, ҳалок бўлган 14 кишининг барчасининг жасади топилган. 25 сентябрь куни Қозоғистонда Каспий денгизида ҳалок бўлган ҳарбийлар хотирасига умуммиллий мотам куни деб эълон қилинди.
