“Каттақўрғон” футболчилари. “Каттақўрғон” ФК фотосурати
«Каттақўрғон» футбол клубига Ўзбекистон Про-лигасининг 21-тури доирасида Бекободнинг «Металлург» жамоасига қарши ўз майдонида ўтказилиши керак бўлган учрашувда 0:3 ҳисобида техник мағлубият ёзилди. 8 октябрь куни Самарқандда бўлиб ўтиши режалаштирилган ўйин мажбурий хизматлар белгиланган вақтда етиб келмагани сабабли ўтказилмади. Бу ҳақда Ўзбекистон Профессионал футбол лигаси (ПФЛ) маълум қилди.
«Афросиёб Арена» стадионидаги учрашув соат 16:00 да бошланиши керак эди. Ҳар икки жамоа ва расмий шахслар стадионга ўз вақтида етиб келган, бироқ ўйин бошланишига қадар тез тиббий ёрдам машиналари ва хавфсизлик учун масъул идоралар вакиллари етиб келмаган.
Про-лига регламентига кўра, бундай вазиятда учрашув комиссари 30 дақиқа кутиши керак. Шундан сўнг мезбон жамоага техник мағлубият ёзиш ҳуқуқига эга бўлади.
Учрашувни кечиктириб ўтказиш имкони ҳам бўлмаган. ПФЛ тушунтиришича, «Афросиёб Арена» стадионининг ёритиш тизими профессионал футбол талабларига жавоб бермайди. Шу сабабли ўйинни зарур ёритиш даражасида якунлашнинг имкони бўлмаган. Натижада «Каттақўрғон»га 0:3 ҳисобида техник мағлубият, «Металлург»га эса худди шу ҳисобда ғалаба ёзилган.
Тез тиббий ёрдам машинаси йўқлиги ҳақидаги маълумот ўйин бошланишига атиги бир соат қолганда аниқланган бўлса, вазиятни учрашув арафасида юзага келган ташкилий муаммо сифатида баҳолаш мумкин. Бироқ, Про-лига регламенти мажбурий хизматлар билан таъминлаш масъулиятини мезбон клуб ва стадион зиммасига юклайди. Тез тиббий ёрдам машинаси ўйин бошланишидан камида бир соат олдин стадионда бўлиши шарт. Демак, ташкилотчилар айнан шу вақтга келиб талаб бажарилган ёки бажарилмаганини аниқ билишлари керак эди.
Мезбон клуб нима сабабдан ўз вақтида чора кўрмагани очиқланмаган.
«Фарғона» нашри манбаларига кўра, ўйин бекор қилинганидан кейин «Каттақўрғон» раҳбарияти «Металлург» вакиллари билан учрашувни эртаси куни ўтказиш бўйича келишишга уринган. Бироқ, томонлар муросага кела олмаган. Бундан ташқари, учрашув санасини ўзгартириш тўғрисидаги қарорни фақат Лига тасдиқлаши мумкин.
«Фарғона» билан суҳбатлашган «Каттақўрғон» футболчиларидан бири жамоа ўйинчилари ва бош мураббий Илёс Зейтуллаев юз берган воқеадан қаттиқ тушкунликка тушганини айтди. Суҳбатдошнинг таъкидлашича, жамоа мавсумнинг энг муҳим учрашувларидан бирига узоқ вақт тайёргарлик кўрган.
«Металлург» устидан қозониладиган ғалаба «Каттақўрғон»га Про-лиганинг кучли бешлигига қайтиш учун курашни давом эттириш имконини берган бўларди. Мавсум якунларига кўра, иккинчи ўриндан бешинчи ўрингача бўлган жамоалар плей-оффда иштирок этади. Ушбу мини-турнир ғолиби Суперлигага чиқиш учун ўтиш учрашувида қатнашиш ҳуқуқини қўлга киритади.
Бекор қилинган учрашувдан сўнг Зейтуллаев стадионга келган мухлислар олдига чиқиб, юз берган ҳолат учун узр сўради.
«Бош мураббий сифатида бугунги ташкилий муаммо учун масъулиятни ўз зиммамга оламан ва барчадан узр сўрайман. Бундай ҳолат бошқа такрорланмаслигига ваъда берамиз. Бугунги кун биз учун катта сабоқ бўлди», — деди мутахассис.
Про-лига чемпионати 26 турдан иборат. Демак, 21-турдан кейин мунтазам чемпионат якунланишига яна бешта учрашув қолган. Жорий мавсумда Про-лигада 14 та жамоа иштирок этмоқда. Мусобақа ғолиби тўғридан-тўғри Суперлигага йўлланма олади. Иккинчи ўриндан бешинчи ўрингача жойлашган клублар эса юқори дивизионга кўтарилиш учун қўшимча имкониятни қўлга киритиш мақсадида ўзаро кураш олиб боради.
