Қозоғистон Сунъий интеллект ва рақамли ривожланиш вазирлиги Россияда компания серверларига қилинган ҳужумдан сўнг мамлакатда «Яндекс»нинг айрим сервислари ишида кузатилган узилишларга изоҳ берди. Вазирлик матбуот баёнотида компаниянинг .kz доменидаги маҳсулотларига хизмат кўрсатувчи серверлар мамлакат ҳудудида жойлаштирилиши кераклигига оид қозоғистонликларнинг эътирозларига жавоб берди.
Вазирлик Қозоғистон фойдаланувчиларининг шахсий маълумотларини сақлаш учун мўлжалланган серверлар республика ҳудудида жойлашгани ва меъёрий тартибда ишлаётганини маълум қилди. Бироқ, бу «Яндекс»нинг бутун инфратузилмаси Қозоғистонда жойлашганини англатмайди.
«Такси ва етказиб бериш хизматларини кўрсатиш учун зарур бўлган айрим компонентлар Қозоғистондан ташқарида жойлашган», — дея изоҳ берди Рақамли ривожланиш вазирлиги.
Айни пайтда «Яндекс» сервислар фаолиятини тиклаш ишларини олиб бормоқда. Вазирлик зарур ёрдам кўрсатиш мақсадида компания ва Қозоғистоннинг инфратузилма ташкилотлари билан ҳамкорлик қилмоқда.
«Шу билан бирга, бошқа такси ва етказиб бериш платформалари билан ҳам юклама ортиши шароитида уларнинг барқарор ишлашини таъминлаш бўйича ишлар олиб борилмоқда», — дея қўшимча қилади вазирлик.
2023 йил декабрь ойида Қозоғистон Рақамли ривожланиш вазирлиги матбуот хизмати «Яндекс» маҳаллий қонунчилик талабларига мувофиқ, серверларини мамлакат ҳудудида жойлаштиргани ҳақида ҳисобот берган эди. «Энди yandex.kz мамлакат ҳудудида жойлашган серверларда ишлайди», — дейилган эди ўшанда вазирлик хабарида.
11 октябрь куни учувчисиз учиш аппарати Москвадан тахминан 180 километр узоқликда жойлашган Владимир шаҳридаги «Яндекс» маълумотлар маркази инфратузилмасига зарар етказди. Марказ фаолияти бутунлай тўхтатилди. Бу бир ҳафта ичида Россиядаги «Яндекс» маълумотлар марказларига берилган учинчи зарба бўлди. 8 октябрга ўтар кечаси дрон Рязань вилоятининг Сасово шаҳридаги маълумотлар марказига зарар етказган, 9 октябрь куни эса компания Калуга вилоятидаги объектига ҳужум қилинганини маълум қилган эди.
Ускуналарнинг шикастланиши компания сервислари ишида Россияда, шунингдек, Қозоғистон, Ўзбекистон ва Қирғизистон каби бир қатор мамлакатларда узилишларга олиб келди. Маҳаллий аҳоли такси буюртма қилиш, тайёр овқат ва озиқ-овқат маҳсулотларини етказиб бериш хизматларидан фойдаланишда муаммолар юзага келганидан шикоят қилди.
