dzen.ru сайти фотосурати
Россиядаги Ўзбекистон ва Қирғизистон фуқаролари хорижий давлатлар ҳудудида ҳарбий ҳаракатларда қатнашмасликдан огоҳлантирилди.
Ўзбекистон Ташқи меҳнат миграцияси агентлиги (ТММА) Россия Федерациясида вақтинча бўлиб турган ватандошларни Россия ва Украина ўртасидаги қарама-қаршиликка аралашмасликка, можаро зоналарига бормасликка ва у ерда бўлаётган ҳарбий ҳаракатларда қатнашмасликка чақирди.
«Эслатиб ўтамиз, Ўзбекистон Республикаси Жиноят кодексининг 154 прим 1-моддасида чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга ёлланиш уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланиши кўзда тутилган», — дейилади ТММА хабарида.
Агентлик, шунингдек, Россия Федерацияси ҳудудида рухсат этилмаган митингларда иштирок этиш хавфидан ҳам огоҳлантирди – бундай ҳаракатлар жиноий жавобгарликка тортилиш ёки мамлакатдан мажбуран чиқариб юбориш билан якунланиши мумкин. Агентлик ватандошлардан бундай оммавий тадбирларда қатнашмасликни, Россия Федерацияси қонунларига риоя қилишни ва одамлар гавжум жойларга бормасликни сўради.
Қирғизистоннинг Россиядаги элчихонаси ҳам хорижий давлатлар ҳудудидаги қуролли можароларда қатнашмасликка чақирди. Дипломатик миссиянинг бундай баёнотига Россия расмийларининг РФ Қуролли Кучларида хизмат қилиш учун шартнома имзолаган хорижликларга соддалаштирилган тартибда фуқаролик бериш тўғрисидаги қарори сабаб бўлди.
«Қирғизистон Республикаси Жиноят кодексининг 256-моддасига мувофиқ, Қирғизистон Республикаси фуқароларининг хорижий давлатлар ҳудудида ҳарбий ҳаракатларда иштирок этиши уларнинг мол-мулки мусодара қилиниши, ўн йилгача озодликдан маҳрум этилиши билан жазоланади. Қирғизистон Республикаси фуқаролари ҳарбий амалиётларда қатнашиш учун таклифлар олган тақдирда, бу ҳақда Қирғизистон Республикасининг Россия Федерациясидаги дипломатик ваколатхонасига зудлик билан мурожаат қилишларини сўрайди», — дейилади дипломатик миссия хабарида.
20 сентябрь куни Россия Давлат Думаси иккинчи ва учинчи ўқишда қонунчиликка ўзгартиришлар киритди, унга кўра Россия Федерацияси Қуролли Кучларида, бошқа қўшинларда ёки ҳарбий тузилмаларда камида бир йил хизмат қилиш учун шартнома тузган чет эл фуқаролари вақтинча яшашга рухсатнома олмасдан туриб, соддалаштирилган тартибда Россия фуқаролигини олишлари мумкин. Ҳозирда ҳарбий шартнома бўйича талаб қилинадиган хизмат муддати — уч йилни ташкил этади. 21 сентябрь куни тузатишлар Федерация Кенгаши томонидан маъқулланган.
Москва мэри Сергей Собянин «Сахарова» миграция марказида «Россия Мудофаа вазирлигига чет эл фуқароларини ҳарбий хизматга жалб этишда ёрдам берадиган тўлиқ инфратузилма» очилганини эълон қилди.
«Шаҳар хизматлари шартномалар тузиш фуқаролар учун имкон қадар қулай бўлиши учун қўлидан келган барча ишларни қилади», — деди Собянин.
