Шавкат Мирзиёев. Ўзбекистон президенти матбуот хизмати фотосурати
Жорий йили Ўзбекистон Солиқ қўмитаси маҳаллалар ўртасида энг яхши солиқ тўловчилар рейтингини тузишни бошлайди. Юзта ўриндан жой олганлар давлат томонидан рағбатлантирилади. Бу ҳақда Президент Шавкат Мирзиёев маҳалла тизимини такомиллаштириш ва жойларда ишни самарали ташкил этиш масалаларига бағишланган йиғилишда маълум қилди, деб хабар беради унинг матбуот хизмати.
Давлат раҳбари солиқ органи рейтингни тузишда ер ва мол-мулк солиғи тўловлари даражасини ҳисобга олишини таъкидлади.
Энг яхши натижаларга эришганларга мукофотлар берилади: «Ташаббусли бюджет» доирасидаги лойиҳаларни амалга ошириш учун маҳалла харажатларининг 75 фоизи давлат томонидан қопланади, шунингдек, ҳар бир маҳаллага қўшимча 2 миллиард сўм (164,6 минг доллар) ажратилади.
Бундан ташқари, Қонунчилик палатаси депутатларига ўз округидаги маҳаллалар инфратузилмасини яхшилаш учун ҳар бирига 3 миллиард сўмдан (247 минг доллар) маблағ берилади. Маҳалла ҳудудида санитария, экология ва ноқонуний қурилиш бўйича жарималарнинг 10 фоизи маҳалла бюджетига йўналтирилади. Маҳаллалар бюджетига 2026 йилдан бошлаб ҳар йили 200 миллиард сўмдан (тахминан 16,5 миллион доллар) ажратилади.
Ўзбекистон раҳбари сарҳисоб қилганидек, юқорида санаб ўтилган барча манбаларни инобатга олган ҳолда келгуси йилда 2000 та маҳалла бюджетига қўшимча 8,5 триллион сўм (деярли 700 миллион доллар) қўшилади.
Президент яқинда қабул қилинган қарор доирасида мутасаддилар томонидан кўмакка муҳтож 33 та туман ва 330 та маҳалла аниқланганини эслатди. Мазкур дастурни амалга ошириш учун жами 7 триллион сўм (576 миллион доллардан ортиқ) маблағ йўналтирилади.
Қайд этилишича, вилоятлар ҳокимларига ўз ҳудудларидаги иккита муаммоли маҳаллани, яна биттасини аниқлаш бўйича туман раҳбарларига тегишли топшириқлар берилган. Кейинчалик бу жамоаларга 5 миллиард сўм (411,5 минг доллар) ажратилади. Бундай ёндашув 236 та маҳалла аҳолисининг аҳволини кескин яхшилайди, деди Мирзиёев.
Шу билан бирга, аҳоли йўлларни таъмирлаш, сув таъминоти тармоқлари, мактаб ва болалар боғчалари қурилиши билан шуғулланаётган ҳар қандай маҳалла харажатларининг ярмини давлат қоплайди. Мингта шундай ташаббусни амалга ошириш учун 500 миллиард сўм (41 миллион доллардан ортиқ) бюджет маблағлари сарфланиши тахмин қилинмоқда.
Мамлакат раҳбари тадбиркорликни ривожлантириш ҳақида гапирар экан, бугунги кунда 7 минг маҳалла гулчилик, боғдорчилик, асаларичилик, тикувчилик, мебель ишлаб чиқариш ва бошқа 15 йўналишга ихтисослашганини таъкидлади. Қарийб 3500 та маҳалладаги 50 фоиз хонадонни тадбиркорлик фаолиятига жалб этилиши натижасида 1,5 миллионга яқин оила барқарор даромад ола бошлади.
Бу борадаги ишлар давом эттирилади. Биргина жорий йилнинг ўзида ҳар бир маҳаллада ўртача 40 тадан микролойиҳани амалга ошириш учун банклар ва вилоятлар ҳокимларига 6,5 триллион сўм (535 миллион доллар) ажратилган.
Президент шунингдек, маҳаллий ҳокимият органларига 5000 квадрат метргача бўлган бўш давлат мулкларини кимошди савдосига қўйишга рухсат берилганини ҳам маълум қилди. Бундан ташқари, ушбу биноларни сотишдан тушган маблағнинг 70 фоизи маҳаллада қолади, тегишли маблағ эса инфратузилмани ривожлантиришга йўналтирилади.
Давлатимиз раҳбари маҳаллий аҳолига кўрсатилаётган хизматлар, жумладан, кредитлар, субсидиялар, компенсациялар, моддий ёрдам олиш каби хизматларни соддалаштирган «маҳалла еттилиги»нинг ролини алоҳида таъкидлади. Натижада 7,5 миллион фуқаро қашшоқликдан қутулди, ишсизлик икки баробарга камайди, 3500 дан ортиқ маҳалла замонавий қиёфа касб этди.
Аммо уларнинг саъй-ҳаракатлари самарали бўлиши учун фаоллар ягона механизм сифатида ҳаракат қилишлари лозим.
«Ислоҳотларимизнинг остонаси бўлган ҳар бир маҳаллага Янги Ўзбекистон нафасини олиб кириш, энг аввало, «маҳалла еттилиги»нинг ягона жамоа бўлиб ишлашига бевосита боғлиқ», — дея хулоса қилди Мирзиёев.
