gazeta.uz сайти фотосурати
2026 йилдан бошлаб Ўзбекистонда барча тиббиёт муассасаларида раҳбар ва бош шифокор лавозимлари бир-биридан ажратилади. Уларга раҳбарлар менежерликка ўқиган, яхши натижалар кўрсатган тадбиркорлар орасидан тайинланади. Бу ҳақда президент Шавкат Мирзиёев маълум қилди, деб хабар беради унинг матбуот хизмати.
Ушбу янги қоидалар 26 та марказ директорларига, вилоят ва туман соғлиқни сақлаш бошқармалари раҳбарларига ва оилавий поликлиникалар раҳбарларига тааллуқли бўлади.
Муассаса директорлари аниқ ойлик режалар асосида ишлайди. Шунингдек, улар бир ой давомида энг муаммоли ҳудудлар ва маҳаллаларга бориб, касаллик сабабларини ўрганишлари, ечимларни таклиф қилишлари ва маҳаллий мутахассисларни янги даволаш усуллари бўйича ўқитишлари шарт бўлади.
Рағбатлантириш тизими ҳам ўзгаради. Энг яхши вилоят ва туман тиббиёт муассасалари ва оилавий поликлиникалар раҳбарларига «Ўзбекистонда хизмат кўрсатган тиббиёт ходими» унвони, орден ва медаллар ҳамда 30 миллион сўм (2500 доллар) миқдорида пул мукофотлари берилади. Мазкур ходимлар бошқарадиган касалхоналар инфратузилмасини яхшилаш учун 500 миллион сўм (41 500 доллар) ажратилади.
Бундан ташқари, ҳар бир вилоятда энг яхши 2 та туманнинг соғлиқни сақлаш бўлими раҳбари ва оилавий поликлиника мудири АҚШ, Германия, Буюк Британия, Корея, Туркия каби тиббиёти ривожланган мамлакатларга менежерликка ўқитиш учун юборилади.
Соҳа бошқарув тизимидаги ўзгаришларни қўллаб-қувватлаш мақсадида президент сўнгги беш йил ичида ихтисослашган марказларга сўнгги беш йилда 7,5 триллион сўм (623 миллион доллардан ортиқ) маблағ берилиб, улар минглаб энг замонавий ускуналар билан жиҳозланди. Шунга қарамай, ускуналарнинг қувватидан бор-йўғи 25 фоиз фойдаланилаётгани кўрсатиб ўтилди. Шунинг учун профилактика ва даволаш бўйича аниқ режалар тузиш, шунингдек, катта харажатлар эвазига сотиб олинган қимматбаҳо ускуналардан самарали фойдаланишни таъминлаш зарур.
Ислоҳотлар таълим тизимига ҳам таъсир қилади. Келгуси ўқув йилидан тиббиёт олийгоҳларининг бакалавр босқичида педиатрия ва даволаш йўналишларини ўз ичига олган умумий тиббиёт факультети очилиши эълон қилинди. Уларда оилавий шифокорлик мутахассислиги бўйича резидентура ва магистратура ҳам йўлга қўйилади.
Резидентурада таълим олаётган талабалар бепул ўқиш билан бирга оилавий шифокор сифатида ишлаб маош олади. Резидентура битирувчиси оилавий шифокорлик бўйича тор соҳа дипломи ва 150 фоизли устама олади.
Эндиликда оддий муолажани қиладиган эмас, ташхис, даволаш ва профилактикада шифокорга кўмакчи бўладиган ҳамшираларни тайёрлашга ўтиш зарурлиги кўрсатиб ўтилди. Бунинг учун Ҳамширалар академияси Тошкент давлат тиббиёт университети тасарруфига ўтказилиб, негизида Олий касбий тиббиёт академияси ташкил қилинади. Келгуси йилдан барча тиббиёт олийгоҳларида олий ҳамширалик иши йўналиши очилади, олий маълумотли ҳамшираларнинг маошига 100 фоиз устама берилади.
Давлат раҳбари хусусий секторни қўллаб-қувватлашни давом эттиришини эълон қилди. Хусусан, келгуси йилдан тиббий ускуна, жиҳоз ва тез ёрдам машиналарини олиб кириш бўйича имтиёз 3 йилга узайтирилади. Умумий овқатланиш корхоналарига ҚҚСнинг бир қисмини қайтариш бўйича берилган имтиёз хусусий тиббиёт ташкилотларига ҳам қўлланади. Замонавий кўп тармоқли клиникаларни ташкил қилиш ва уларни жиҳозлаш учун тадбиркорларга 200 миллион долларлик имтиёзли ресурс ажратилади.
«Мен шифокор эгнидаги оқ либосни нафақат касб белгиси, балки Ватанга чексиз садоқат рамзи деб биламан. Бундан буён ҳам шифокорнинг, ҳар бир тиббиёт ходимининг обрўсини ҳимоя қилиш, унга ҳар томонлама муносиб шароит яратиш эътиборимиз марказида бўлади», — деди Мирзиёев.
