Абдулазиз Комилов. nuz.uz сайти фотосурати
Ўзбекистон президентининг ташқи сиёсат бўйича маслаҳатчиси Абдулазиз Комилов мамлакатнинг Тинчлик Кенгашига қўшилиши ҳақида гапирар экан, ушбу ташкилотга қўшилиш мамлакатнинг ташқи сиёсат манфаатларига мос келишини таъкидлади. Дипломатнинг сўзларини «Газета.uz» нашри «Ўзбекистон 24» телеканалига таяниб келтирди.
Комилов Тинчлик кенгашини тузиш ташаббусини илгари сурган АҚШ президенти Дональд Трамп ташкилотнинг асосий мақсади этиб Ғазодаги можарони ҳал қилиш масаласини белгилаганига урғу берди. Марказий Осиё республикаси Яқин Шарқдаги инқирозга барҳам берилишидан манфаатдор экани сабабли, унинг раҳбари Шавкат Мирзиёев Америка раҳбари ғоясини қўллаб-қувватлади.
Мавзуни давом эттираркан, маслаҳатчи ушбу қарорнинг асосий сабабларини баён қилди.
«Биринчидан, хавфсизлик нуқтаи назаридан, албатта, бизнинг манфаатларимиз бор. Иккинчидан, кенгашни олдида турган вазифалар, мақсадлар бизнинг ташқи сиёсатимизнинг асосий тамойилларига тўлиқ жавоб беради ва мос келади. Учинчидан, ҳақиқатдан ҳам бу минтақада биз жуда жиддий ҳаётий манфаатларимиз бор», — деди тушунтирди Комилов.
Маслаҳатчи Ўзбекистон раҳбари нега минтақага эътибор қаратганини сўзлади. Камиловнинг қайд этишича, Ўзбекистон фуқаролари минтақадаги экстремист оқимларга, ташкилотларга, гуруҳларга қўшилиб, кейин мамлакатга қайтиб келиб, муаммо туғдиришга ҳаракат қилмоқчи ҳам бўлган. Лекин давлат томонидан улар мамлакатга қайтарилиб, ижтимоий янги ҳаётга киритиш учун шароитлар яратиб берилган.
Комилов таъкидлашича, бундай гуманистик ёндашув Бирлашган Миллатлар Ташкилоти томонидан юқори баҳоланган ва Мирзиёевнинг бу борадаги сиёсати бутун дунё учун намуна бўла олади, деб ҳисоблайди.
«Мана шунинг учун биз айтишимиз мумкин, Ўзбекистонда ана шу минтақада бошқа давлатлар билан бирга манфаатлари бор ва бу манфаатдорлик яна шундан иборатки, авваламбор, ўзимизнинг хавфсизлигимизни таъминлаш», — деди маслаҳатчи.
Комилов шунингдек, Яқин Шарқ ва Афғонистон ўртасидаги алоқаларни ҳам таъкидлади. Унинг сўзларига кўра, можаро бошланишидан олдин қўшни мамлакатда экстремист ёки террорчи ташкилотлар бўлмаган. Аммо кейин турли жангари гуруҳлар пайдо бўлган ва дипломатнинг сўзларига кўра, улар Яқин Шарқдан келган.
Шунинг учун бу масалани ҳал қилиш учун бутун халқаро ҳамжамият бирлашиб, нафақат АҚШ, араб давлатлари, мусулмон давлатлари, балки Марказий Осиё давлатлари биргаликда ҳаракат қилишлари керак.
«Ҳар битта қадамни ўйлаб қўйиб, тинчлик ўрнатилса, барқарорлик ўрнатилса, бу жуда муҳим қадам бўлади», — деди президент маслаҳатчиси.
ℹ️ 19 январь куни Мирзиёев АҚШ президенти Дональд Трампга республиканинг халқаро Тинчлик кенгаши ташаббусига таъсисчи давлат сифатида қўшилишга тайёрлигини билдирди.
Бир неча кундан сўнг, Швейцариянинг Давос шаҳрида Марказий Осиё мамлакати раҳбари Тинчлик кенгаши низомини имзолади ва шу билан ташкилотга қўшилди. Қозоғистон ҳам унга қўшилганини қўшимча қиламиз.
