Қамчибек Ташиев суд залида. kaktus.media сайти фотосурати
Миллий хавфсизлик давлат қўмитаси (МХДҚ)нинг собиқ раиси, Қирғизистон Бош вазирининг собиқ ўринбосари Камчибек Ташиев ҳамда «75 мактуб» иши бўйича яна етти нафар айбланувчи Жиноят кодексининг 326-моддаси («Ҳокимиятни зўрлик билан эгаллаш») бўйича айбдор деб топилди. Уларнинг барчаси мол-мулки мусодара қилинган ҳолда 4 йил муддатга озодликдан маҳрум этилди, деб хабар беради 24.kg нашри.
Шу билан бирга, суд барча судланувчиларни Жиноят кодексининг 337-моддаси («Мансаб ваколатини суиистеъмол қилиш») бўйича оқлади.
Ҳукм қилинганлар орасида:
▪️ Нурланбек Тургунбек уулу — Қирғизистон Жогорку Кенешининг (парламенти) собиқ спикери;
▪️ Қурманқул Зулушев — Жогорку Кенешнинг собиқ депутати;
▪️ Бекболот Талгарбеков — жамоат арбоби;
▪️ Эмилбек Узакбаев — Қирғизистоннинг Ўзбекистондаги собиқ элчиси;
▪️ Курманбек Дийканбаев — Жогорку Кенешнинг собиқ депутати;
▪️ Аали Карашев — Қирғизистон Бош вазирининг собиқ ўринбосари;
▪️ Курсан Асанов — Ички ишлар вазирининг собиқ ўринбосари.
Бироқ, маҳкумлар жазони колонияда ўтамайдилар — озодликдан маҳрум қилиш жазоси уч йиллик пробация назорати билан алмаштирилди. Агар улар уч йил давомида қонунни ёки пробация шартларини бузсалар, озодликдан маҳрум этилишлари мумкин. Суд изоҳига кўра, бундай қарор жиноят охирига етказилмагани ва тайёргарлик босқичида қолгани сабабли қабул қилинган. Шунингдек, суд судланувчиларнинг шахсини инобатга олиб, уларни жамиятдан ажратмасдан туриб ҳам тузатиш мумкин, деган хулосага келган.
Февраль ойидан буён қамоқда сақланаётган беш нафар айбланувчи — Талгарбеков, Узакбаев, Дийканбаев, Карашев ва Асанов — суд залининг ўзидаёқ озодликка чиқарилди.
Бундан аввал прокурор барча айбланувчиларга нисбатан тўққиз йилдан озодликдан маҳрум қилиш жазосини тайинлашни сўраган эди. Судланувчилар эса сўнгги сўзларида суддан уларни оқлашни сўрашган.
Ташиев ва Зулушевнинг адвокатлари суд ҳукмига қўшилмасликларини билдириб, уни юқори суд инстанциясида шикоят қилиш ниятида эканликларини маълум қилди.
ℹ️ Эслатиб ўтамиз, 2026 йил 9 февраль куни президент ва парламент спикерига муддатидан аввал президентлик сайловларини ўтказиш чақириғи билан мурожаат эълон қилинган эди. Ушбу мурожаатга 75 нафар шахс имзо чеккан.
Орадан бир кун ўтиб, 10 февраль куни Қирғизистон президенти Садир Жапаров Камчибек Ташиевни Бош вазир ўринбосари ва Миллий хавфсизлик давлат қўмитаси (МХДҚ) раиси лавозимларидан озод қилди. Президент бу қарорини «жамиятда, жумладан давлат тузилмалари ўртасида бўлинишга йўл қўймаслик, аксинча, бирдамликни мустаҳкамлаш» истаги билан изоҳлаган.
Кейинроқ Ташиевга нисбатан «75 шахс иши» деб номланган жиноят иши қўзғатилди. Дастлаб иш материаллари махфийлаштирилди ва суд мажлислари ёпиқ тарзда ўтказилди. 15 июндан бошлаб суд муҳокамалари очиқ тартибда ўтказилди, аммо 22 июндан эътиборан улар яна махфий тартибга ўтказилди.
