Садриддин Ҳасанов ва Сайфиддин Содиқов. ЎФА фотосурати
Ёш ўзбек футболчилари Садриддин Ҳасанов ва Сайфиддин Содиков ўз фаолиятини Португалиянинг «Брага» клуби тизимида давом эттиради. Иккала футболчининг номи 2026/27 мавсумига тайёргарликни бошлаган футболчилар рўйхатига киритилган. Бу ҳақда Португалия клуби матбуот хизмати маълум қилди.
Команданинг U23 жамоаси учун биринчи йиғин 1 июль куни «Брага» спорт марказида бўлиб ўтган. Футболчилар тиббий кўрик ва функционал тестлардан ўтказилган. Тайёргарликнинг бошида жами 31 нафар ўйинчи қатнашган. Ҳасанов ва Содиков қайдномада ҳужумчилар сифатида кўрсатилган. Жамоага португалиялик мутахассис Тиаго Вейга бошчилик қилмоқда.
Футболчиларнинг иккаласи ҳам 18 ёшда бўлиб, улар 2025 йилда 17 ёшгача бўлганлар ўртасидаги Осиё Кубогини қўлга киритган Ўзбекистон ёшлар терма жамоасида ўйнаган. Ҳасанов турнирнинг энг яхши футболчиси деб топилган ва финалда Саудия Арабистонига қарши ўйинда (2:0) голлардан бирини урган.
Иккала футболчи жорий мавсумда Ўзбекистон Суперлигасида ҳам дебют қилган. Содиков «Андижон» сафида учта ўйин ўтказган, Ҳасанов эса Тошкентнинг «Бунёдкор» жамоаси учун 6 та учрашувда иштирок этган.
Аввалроқ ўзбек ОАВлари Ҳасанов ва Содиков ижара асосида кейинчалик сотиб олиш ҳуқуқи билан «Брага»га ўтиши мумкинлиги ҳақида хабар берганди. Бироқ ФИФА қоидаларига кўра, ЕИдан ташқаридаги юниорлар 18 ёшга тўлмасдан профессионал шартнома имзолай олмайди. Айрим маълумотларга кўра, Ҳасановни сотиб олиш нархи 250 минг евро, Содиковники эса 300 минг евро деб баҳоланган. Тўлиқ трансфер ҳолатида футболчилар беш йиллик шартнома имзолаши мумкин. Шу билан бирга, «Брага» клуби ўтишнинг ҳуқуқий мақоми, шартнома муддатлари ва молиявий шартларини ошкор қилмаган. Шунингдек, ўзбек футболчилари учун алоҳида тақдимот ҳам ўтказилмаган.
Ўтган йил бошида «Брага» яна бир ўзбек ҳужумчиси — Хусайн Норчаевга ҳам қизиқиш билдирган, бироқ трансфер амалга ошмаган.
