sb.by сайти фотосурати
Ўзбекистон ўзининг саккизта вилоятини Беларуснинг муайян ҳудудларига бириктириб, қўшма ишлаб чиқариш корхоналарини йўлга қўйиш ва инвестиция лойиҳаларини амалга оширишни режалаштирмоқда. Бу қарор 15 июль куни президент Шавкат Мирзиёев танишган тақдимот якунлари бўйича қабул қилинди, деб хабар беради давлат раҳбари матбуот хизмати.
Ўзбекистоннинг Андижон вилояти ва Беларуснинг Витебск вилояти ўртасида ишлаб чиқилган ҳамкорлик модели икки мамлакатнинг бошқа ҳудудларига ҳам татбиқ этилади. Бухоро, Қашқадарё, Навоий, Наманган, Тошкент, Фарғона, Самарқанд ва Сурхондарё вилоятлари Беларуснинг Витебск, Могилёв, Гродно, Гомель ва Брест вилоятларига бириктирилади. Ҳар бир ҳудудлар жуфтлиги учун янги ишлаб чиқариш корхоналарини ташкил этиш ва аҳоли бандлигини таъминлаш бўйича алоҳида «йўл хариталари» тасдиқланади.
Бу қарор Ўзбекистон президентининг 8–9 июль кунлари Беларусга амалга оширган расмий ташрифи давомида эришилган келишувлар натижаси бўлди. Ўшанда томонлар ўзаро савдо ҳажмини 2 миллиард АҚШ долларига етказиш ва умумий қиймати яна 2 миллиард доллар бўлган 310 та қўшма лойиҳани амалга оширишга келишиб олган эди. Лойиҳалар машинасозлик, қишлоқ хўжалиги, фармацевтика, тўқимачилик саноати, ёғочни қайта ишлаш ва соғлиқни сақлаш соҳаларини қамраб олади.
Тақдимотда таъкидланишича, Беларусда инвестиция лойиҳаларини жойлаштириш учун таклиф этилаётган саноат объектлари, давлат мулки ва кенг қишлоқ хўжалиги ерлари мавжуд. Мамлакат ҳудудининг 40 фоизини ёки 8 миллион гектарини қишлоқ хўжалиги майдонлари ташкил этади. Бу имкониятлар қўшма ишлаб чиқариш корхоналарини ташкил этиш, аграр кооперацияни ривожлантириш ва ишбилармонлик алоқаларини кенгайтириш учун мустаҳкам асос яратади.
Тақдимотда Андижон ва Витебск вилоятлари ўртасидаги ҳамкорликка алоҳида эътибор қаратилди. Бу ҳудудлар ўртасида аллақачон «йўл харитаси» тасдиқланган ва аниқ ташаббусларни амалга ошириш бошланган. Жумладан, Андижон вилоятидан 255 нафар фуқаро уюшган ҳолда Витебск вилоятига юборилиб, иш билан таъминланган. Шунингдек, 11 та чорвачилик мажмуаси негизида янги лойиҳаларни йўлга қўйиш бўйича келишувга эришилди. Уларнинг ҳар бири 200 бошдан 3 минг бошгача қорамол парваришлаш имкониятига ҳамда етарли озуқа майдонларига эга.
Умуман олганда, Витебск ва Беларуснинг бошқа вилоятларида чорвачилик, ёғочни қайта ишлаш, логистика, савдо ва хизмат кўрсатиш соҳаларида қиймати 100 миллион доллардан ортиқ бўлган 30 та янги лойиҳа портфели шакллантирилган.
Хусусан, Витебск вилоятида 3 минг бош қорамолга мўлжалланган йирик сутчилик мажмуаси, бир қатор ўрта ҳажмдаги чорвачилик хўжаликлари, ёғочни чуқур қайта ишлаш ва унинг чиқиндиларидан пеллет ишлаб чиқариш корхонасини ташкил этиш режалаштирилган.
Логистика соҳасида йил охирига қадар «Беларусь темир йўллари» билан ҳамкорликда Витебск вилоятидаги Орша станциясида интермодал логистика марказини ишга тушириш режалаштирилмоқда. У имтиёзли тариф шартлари асосида экспорт-импорт юкларига хизмат кўрсатади. Шунингдек, икки мамлакат ўртасида блок-поездларнинг тўғридан-тўғри қатновини йўлга қўйиш вазифаси қўйилди.
Тақдимотда Ўзбекистон фуқароларини ташкилий тартибда ишга жойлаштириш масалаларига ҳам алоҳида эътибор қаратилди. Биринчи босқичда Витебск ва Беларуснинг бошқа вилоятларидаги 13 та корхонада танлов асосида 1100 нафар фуқарони иш билан таъминлаш режалаштирилган. Сентябрь ойидан бошлаб ҳар ой Витебск вилоятида Андижон вилоятидан 500 нафар аҳолини иш билан таъминлаш кўзда тутилган. Умумий ҳисобда бу рақам 5000 кишини ташкил этади. Бунинг учун Витебск шаҳрида Ўзбекистон Миграция агентлигининг ваколатхонаси очилади.
Тадбиркорларга Беларусда ҳисобварақ очиш, устав фондига маблағ ўтказиш ва лойиҳаларига молиявий ресурслар олишда кўмаклашиш вазифаси қўйилди. Витебск шаҳрида сутчилик мажмуаси, ёғочни қайта ишлаш заводи ва логистика компаниясини ташкил этиш учун зарур маблағларни имтиёзли шартларда ажратиш топширилди.
Мирзиёев ҳар бир эришилган келишув аниқ лойиҳа, янги корхона, қўшимча савдо ҳаж ҳар бир келишув аниқ лойиҳа, янги корхона, қўшимча савдо ҳажми ва муносиб иш ўрнига айланиши шартлигини таъкидлади. Мутасаддиларга эришилган келишувларни амалга ошириш устидан тизимли назоратни таъминлаш ва «йўл хариталари» ижросини танқидий таҳлил қилиб бориш вазифаси юклатилди.
