Ўзбекистон президенти матбуот хизмати фотосурати
Хоразм вилоятида Урганч халқаро аэропортидан Хива темир йўл вокзалигача бўлган темир йўл ишга туширилди. Янги йўналишни президент Шавкат Мирзиёев Хивага электропоездда етиб келган ҳолда кўздан кечирди, деб хабар беради давлат раҳбари матбуот хизмати.
Лойиҳанинг қиймати 225 миллиард сўмни (18,7 миллион доллар) ташкил этади. Узунлиги 11 километр бўлган темир йўл линиясида станция, кўприк, автомобиль йўллари билан кесишмалар ва 25 та сув ўтказиш иншооти барпо этилди.
Йўналишнинг ҳисоб-китоб қилинган ўтказиш қуввати йилига қарийб 650 минг йўловчини ташкил этади. Уларнинг асосий қисмини сайёҳлар ташкил қилиши кутилмоқда. Хива ва Урганч ўртасидаги йўл вақти 80 дақиқадан 40 дақиқага қисқарди.
Бу Ўзбекистонда аэропортни темир йўл тармоғи билан тўғридан-тўғри боғлаш бўйича амалга оширилган биринчи лойиҳадир. Йўналишда Хитойда ишлаб чиқарилган CR200J электропоезди қатнайди. Олти вагондан иборат поезд қарийб 400 нафар йўловчини сиғдира олади ва соатига 160 километргача тезликда ҳаракатланади. Поездда VIP, бизнес ва эконом-класс ўринлари, бепул Wi-Fi, қурилмаларни қувватлаш учун розеткалар ва иқлим назорати тизими мавжуд. Ҳаракатланиши чекланган йўловчилар учун ҳам зарур шароитлар яратилган.
Хивада президентга Урганч аэропортидан Хива вокзалигача бўлган худди шу йўналишда ҳаракатланадиган янги троллейбуслар ҳам намойиш этилди. Ўнта замонавий троллейбус июль ойида Хитойдан олиб келинган. Улар автоном ҳаракатланиш тизими билан жиҳозланган бўлиб, электр тармоғига уланмасдан 100 километргача масофани босиб ўтиши мумкин.
Ушбу троллейбусларни харид қилиш ғояси Мирзиёевнинг ўтган йили Хоразм вилоятига ташрифи ортидан пайдо бўлганди. Ўшанда у турли транспорт турларини интеграция қилиш зарурлигини ҳам таъкидлаган эди. Президентнинг айтишича, бундай ёндашув йўлда сарфланадиган вақтни қисқартириши ва ҳудуднинг сайёҳлик жозибадорлигини ошириши керак.
Сўнгги беш йилда Хоразм вилоятига келаётган хорижий сайёҳлар сони ўн баробарга ошди, меҳмонхона фонди эса тўрт баробар кўпайди. Вилоятда 280 та меҳмонхона ва меҳмон уйи барпо этилди, 11 та янги сайёҳлик объекти ишга туширилди. Шунингдек, майдони 12,3 гектар бўлган сайёҳлик шаҳарчасини ташкил этиш режалаштирилмоқда.
