Александр Вучич (ўнгдан иккинчи), Шавкат Мирзиёев ва бошқа расмийлар. kurir.rs сайти фотосурати
Ўзбекистон иккинчи атом электр станциясини хитойлик ҳамкорлар билан биргаликда қуради. Бу ҳақда Сербия президенти Александр Вучич 8 сентябрь куни Белградда икки мамлакат ишбилармон доиралари иштирокида ўтказилган бизнес-форумда сўзга чиқиб маълум қилди.
«Бугун эрталаб Мирзиёев билан яккама-якка учрашувда ундан сўрадим. Шунда у менга: “Биринчи атом станциясини руслар билан биргаликда қураяпман, иккинчи станцияни хитойликлар билан қураяпман, аммо бу менга етарли эмас. Буларни якунлашимдан олдин яна қурилиш ишларини давом эттираман. Ишлашда давом этаман”, — деди», — дейилади Вучич нутқининг Kurir.rs нашри томонидан эълон қилинган стенограммасида.
Шу тариқа, Хитой Ўзбекистондаги иккинчи АЭС қурилишида иштирок этувчи томон сифатида биринчи марта тилга олинди. Республикада яна бир атом электр станцияси қурилиши ҳақида Мирзиёев август ойининг ўрталарида маълум қилган эди, бироқ қайси давлат ҳамкор бўлишини очиқламаганди.
Ўзбекистоннинг энергетика стратегияси ҳақида гапирар экан, Вучич Мирзиёев мамлакатнинг келажакдаги энергетика қувватларига бўлган эҳтиёжини олдиндан баҳолаётганини таъкидлади. Бунда дата-марказлар, сунъий интеллект тизимлари, инновациялар ва электромобилларнинг ривожланиши ҳисобга олинмоқда. Сербия президенти Ўзбекистон раҳбариятининг электр энергияси ишлаб чиқариш қувватларини оширишга ёндашувини юқори баҳолаб, Европа давлатлари ҳам электр энергиясига бўлажак талабни ҳисобга олиши зарурлигини таъкидлади.
Ўзбекистон биринчи атом лойиҳасини Россия билан ҳамкорликда Жиззах вилоятининг Фориш туманида амалга оширмоқда. АЭС ҳар бири 1 ГВт қувватга эга иккита ВВЭР-1000 реактори ҳамда ҳар бири 55 МВт қувватга эга иккита РИТМ-200Н кичик модулли реактордан иборат бўлади. Биринчи кичик реакторни техник ишга тушириш 2029 йил октябрь–ноябрь ойларида, иккинчисини эса олти ойдан кейин амалга оширилиши кутилмоқда. Биринчи йирик энергоблокни 2033 йилда ишга тушириш, станция қурилишини эса 2034–2035 йилларда тўлиқ якунлаш режалаштирилган. Биринчи АЭСнинг умумий қуввати 2110 МВтни ташкил этади, йиллик электр энергияси ишлаб чиқариш ҳажми 17 млрд кВт·соатга етиши мумкин. Лойиҳанинг базавий қиймати тахминан 9,5 млрд долларга баҳоланмоқда.
Иккинчи атом лойиҳасининг расмий параметрлари — қуввати, қурилиш жойи, муддатлари ва қиймати — ҳозирча ошкор қилинмаган.
