«Ўзбекистон темир йўллари» давлат компанияси Сербияда темир йўллар қурилишига оид лойиҳаларда иштирок этади. Икки мамлакат ҳукуматлари ўртасидаги мазкур келишув ҳақида Марказий Осиё республикаси Инвестициялар, саноат ва савдо вазири Лазиз Қудратов маълум қилди, деб хабар беради Spot.uz.
Вазирнинг таъкидлашича, айни пайтда икки давлат транспорт вазирликлари иккита лойиҳа ва йўналиш бўйича батафсил музокаралар олиб бормоқда. Аввалроқ ОАВда Ўзбекистон мутахассислари Сербия темир йўл тармоғини модернизация қилишда иштирок этиши мумкинлиги ҳақида маълумотлар пайдо бўлган эди. Хусусан, узунлиги 200 километр бўлган темир йўл участкасини қуриш масаласи муҳокама қилинган.
Қудратов мазкур ташаббусни амалга ошириш Ўзбекистонлик қурувчилар учун Европа бозорига чиқиш, келажакда қитъанинг бошқа мамлакатларида ҳам шунга ўхшаш лойиҳаларни амалга ошириш учун замин яратиш борасида катта имконият эканини таъкидлади.
Аввалроқ Марказий Осиё республикаси президенти Шавкат Мирзиёевнинг Белградга ташрифи доирасида транспорт-логистика соҳасида ҳамкорликни назарда тутувчи бир қатор икки томонлама ҳужжатлар имзолангани хабар қилинган эди. Жумладан, тегишли вазирликлар вакиллари йўловчилар ва юкларни халқаро автомобиль ташиш, Ўрта йўлакни ривожлантириш бўйича келишувлар, шунингдек, темир йўл инфратузилмаси соҳасида ҳамкорлик тўғрисида протокол имзолаган.
ℹ️ 7–8 сентябрь кунлари Ўзбекистон президентининг Сербияга тарихдаги илк ташрифи бўлиб ўтди. Ташриф доирасида Шавкат Мирзиёев ва Европа давлати раҳбари Александр Вучич Стратегик шериклик муносабатларини ўрнатиш тўғрисида Қўшма декларацияни имзолади. Бундан ташқари, саноат ва рақамли иқтисодиётдан тортиб меҳнат миграцияси ва логистикагача бўлган турли соҳаларни қамраб олган қатор икки томонлама ҳужжатлар тасдиқланди.
