Дурдона Ҳакимова ва Сайёра Эргашалиева. haberler.com сайти фотосурати
Истанбулнинг 17-Олий жиноят суди Ўзбекистон фуқаролари Дилшод Турдимуротов ва Ғофуржон Камалхўжаевни икки нафар ватандоши — Дурдона Ҳакимова ва Сайёра Эргашалиевани шафқатсизларча ўлдирганликда айбдор деб топиб, уларнинг ҳар бирига икки умрлик қамоқ жазосини тайинлади. Бу ҳақдка Туркиянинг Haberler.com нашри хабар берди.
Шов-шувли қотиллик жорий йил январь ойининг охирида содир бўлган. Эргашалиеванинг оиласи Истанбул полициясига мурожаат қилиб, бир неча кундан бери қариндошидан хабар олмаганини маълум қилган. Ҳуқуқни муҳофаза қилувчи органлар ходимлари ўзбекистонлик аёл муқаддам Ҳакимова ўлдирилгани аниқланган уйда яшаганини аниқлашган. Кузатув камераларидаги ёзувларни синчиклаб ўрганган терговчилар бинодан катта ахлат қоплари ва чемоданлар билан бир неча бор ташқарига чиққан икки нафар эркак шахсини аниқлашган. Кейинчалик гумонланувчилар шу тарзда қурбонларининг парчаланган жасадларини олиб чиқиб, шаҳарнинг турли қисмларидаги чиқинди контейнерларига ташлашгани маълум бўлган.
Кўп ўтмай полиция Туркиядан чиқиб кетишга уринган икки нафар ўзбекистонликни Истанбул аэропортида қўлга олган.
Судда Камалхўжаев Эргашалиева билан шаоъий никоҳда бўлганини маълум қилган. У аёлининг хиёнатини билиб қолгач, ўзини бошқара олмай қолган ва ватандошини пичоқ билан ўлдирган. Айбланувчининг сўзларига кўра, у бу ишни ёлғиз ўзи амалга оширган.
Эртаси куни унинг дўсти Турдимуротов ўз севган қизи — Ҳакимова билан жанжаллашиб қолган. Камалхўжаев уларнинг ярашиб олишлари учун ўз квартирасига киришларига рухсат берган. Кейинроқ Турдимуротов ундан оғир чемоданни пастга олиб тушишда ёрдам беришини сўраган. Гумонланувчининг таъкидлашича, у чемодан ичида нима борлигини ҳатто билмаган ҳам.
Турдимуротов эса, ўз навбатида, Ҳакимова жасадини бўлакларга ажратганини, чунки ўша пайтда ўзини бошқара олмаганини таъкидлаган. У қилмишидан пушаймон эканини айтган ва энг оғир жазога лойиқлигини тан олган.
Натижада суд Ўзбекистоннинг икки фуқаросини оғирлаштирувчи ҳолатларда қасддан одам ўлдириш ва қийноқлар қўллашда айбдор деб топиб, ҳар бирини икки умрлик қамоқ жазосига ҳукм қилган. Бундан ташқари, мигрантларнинг ҳар бирига инсон ўлими ортидан манфаат кўриш йўли билан содир этилган ўғрилик учун етти йилдан қамоқ жазоси тайинланган.
Эслатиб ўтамиз, Туркияда икки нафар ўзбекистонлик аёлнинг ўлдирилиши жамоатчиликда катта шов-шувга сабаб бўлганди. Истанбул ва Анқара шаҳарларида минглаб одамлар иштирокида намойишлар бўлиб ўтган. Намойишчилар «Эркаклар зўравонлигини тўхтатинг», «Ўлдирилган аёллар учун адолат талаб қиламиз» ва «Мигрант аёллар ёлғиз эмас» деган плакатларни кўтариб чиқишган.
«Аёллар энди сукут сақламайди» дея ҳайқирган истанбулликлар ўлдирилган ўзбекистонлик аёллардан бирининг жасади топилган жойгача юриш қилган. Анқарада эса «Биз фемицидларни тўхтатамиз» платформаси томонидан ташкил этилган намойиш бўлиб ўтган. Унда айбдорларни қонун доирасида жавобгарликка тортиш талаб қилинган.
