Аймен Касенов. Қирғизистон Марказий сайлов комиссияси сайти фотосурати
Қирғизистоннинг Сайлов ва референдумлар ўтказиш бўйича марказий комиссияси мамлакат президентлигига биринчи даъвогардан ариза қабул қилди. У ўз номзодини мустақил равишда илгари суриш ниятида бўлган Аймен Касеновдир. Бу ҳақда Марказий сайлов комиссияси хабар берди.
Ариза 14 октябрь куни топширилган. Шу куни аввалроқ Марказий сайлов комиссияси раиси Тинчтик Шайназаров 24.kg нашрига берган интервьюсида комиссия ҳалигача президентликка номзодини қўйиш истагида бўлган бирорта шахсдан ариза олмаганини айтган эди.
Аймен Касенов — 52 ёшли бишкеклик фуқаро. Унинг нефть-газ соҳаси ва давлат тузилмаларида иш тажрибаси бор. 2007 йилдан 2015 йилгача у «Газпромнефть-Қозоғистон» компанияси бош директори лавозимида ишлаган. 2015–2016 йилларда Бишкек мэрининг маслаҳатчиси бўлган, 2016–2018 йилларда эса Россия-Қирғизистон тараққиёт жамғармаси бошқаруви таркибига кирган.
Касенов президентлик сайловларида иштирок этишга биринчи марта уринаётгани йўқ. 2021 йилда ҳам у давлатнинг олий лавозими учун курашган ва сайловчилар овозларининг 0,91 фоизини олган.
Касенов Би-би-сига берган изоҳида сайлов кампаниясида иштирок этиш ниятини тасдиқлади ва ўзининг сайловолди дастури «Жер, суу, аманат» («Ер, сув, ишонч») деб номланишини маълум қилди.
«Менинг айтадиган гапларим бор. Дастур тайёр. Ҳозирча қолганини ошкор қила олмайман — бу ташвиқот ҳисобланади», — деди у.
Қирғизистонда президентлик сайловлари 2027 йил 27 январга белгиланган. Номзодларни илгари суриш жараёни 2026 йил 25 сентябрда бошланган ва 13 ноябрда якунланади. Аввалроқ сиёсатчилар Омурбек Суваналиев ва Сиймик Жапикеев ҳам сайловда иштирок этиш ниятини билдиришган эди. Бироқ, Марказий сайлов комиссияси маълумотларига кўра, Касенов расмий ариза топширган биринчи номзод бўлган.
Мамлакат қонунчилигига мувофиқ, президентликка номзод камида 35 ёшда бўлиши, давлат тилини билиши ва мамлакат ҳудудида жами камида 15 йил яшаган бўлиши керак. Номзодни рўйхатга олиш учун сайловчиларнинг камида 30 минг имзосини тўплаш ва 1 миллион сом (11,4 минг доллар) миқдорида сайлов гарови тўлаш талаб этилади. Бу маблағ давлат бюджетига ўтказилади ва номзод сайловда ғалаба қозонган тақдирда ҳам, номзодини қайтариб олган ҳолда ҳам унга қайтарилмайди.
