Қозоғистонда чет элликлар учун QazETA мобил иловаси орқали индивидуал идентификация рақамини (ИИР) расмийлаштириш бўйича тажриба лойиҳаси ишга туширилди. Ички ишлар вазири Ержан Саденов тегишли буйруқни имзолади, деб хабар беради Tengrinews.kz.
Онлайн хизмат Қозоғистонда вақтинча бўлиб турган хорижий фуқаролар ва фуқаролиги бўлмаган шахслар учун мўлжалланган.
Хизмат танлангач, тизим «Беркут» базаси бўйича Қозоғистонга кириш ҳолатини текширади. Сўнгра ариза берувчи телефондаги геолокацияни тасдиқлаши ва тизим билан тирик инсон ишлаётганига ишонч ҳосил қилиш имконини берувчи Liveness текширувидан ўтиши лозим бўлади.
Иловада дастлаб тўлдирилган ариза пайдо бўлади, шундан сўнг ариза берувчи кўрсатилган маълумотларни текшириб, уларни туғилган жойи, миллати ва алоқа маълумотлари билан тўлдириши керак.
Шундан сўнг аризани кўриб чиқишга юбориш мумкин. Тизим ариза берувчига илгари ИИР берилган-берилмаганини текширади, бундан ташқари, биометрик маълумотлар иммигрантларнинг намунавий базаси билан солиштирилади. Бу, хусусан, бир кишига бир нечта ҳужжат расмийлаштирилмаганини аниқлаш имконини беради.
Давлат хизматини кўрсатиш муддати бир иш кунини ташкил этади. Ариза топширилган кун ушбу муддатга киритилмайди.
Кўриб чиқиш натижаси иловада пайдо бўлади. Ижобий қарор қабул қилинган тақдирда, ариза берувчи ўз ИИРни кўриши ва PDF форматидаги рўйхатга олиш гувоҳномасини юклаб олиши мумкин. Хизмат кўрсатиш рад этилса, сабаби кўрсатилган билдиришнома юборилади.
Нотўғри ҳужжатлар ёки маълумотлар, шунингдек, тақдим этилган маълумотларнинг белгиланган талабларга номувофиқлиги рад этишга асос бўлиши мумкин.
ИИВ буйруғи 9 ноябрдан кучга кирди ва бир йил давомида амал қилади.
Қозоғистонда ИИР давлат хизматларидан фойдаланиш, шунингдек, республика банкларида тўлов карталарини очиш учун зарурдир. Ҳозирда хорижликлар уни шахсан аҳолига хизмат кўрсатиш марказларига (АХКМ) мурожаат қилиш орқали олишлари мумкин. Масофадан расмийлаштириш эса фақат eResidency дастури доирасида мавжуд.
QazETA — мамлакатга кириш учун электрон рухсатномалар тизими бўлиб, уни жорий этиш Қозоғистонда яқинда бошланди. У республика билан визасиз режим ўрнатилган давлатлар, шу жумладан Россия фуқароларига татбиқ этилади. 2027 йил 1 июлдан бошлаб бундай рухсатноманинг йўқлиги кўзда тутилган ҳолатлардан ташқари, мамлакатга киришни рад этиш учун асос бўлади.
