mt.ru сайти фотосурати
Россиянинг Wildberries маркетплейси омборларига дронлар ҳужумлари Ўзбекистон экспорти ҳажмининг камайишига олиб келди ва республика ҳукуматини савдо платформаси раҳбарияти билан алоҳида йиғилиш ўтказишга мажбур қилди. Бу ҳақда Spot.uz хабар берди.
Масала 5 август куни Ҳукумат комиссиясининг Хоразм вилояти тадбиркорлари билан ўтказган очиқ мулоқотида кўтарилган. Шовот туманидаги ARTATEX тўқимачилик компанияси раҳбари Наргиза Бекмуратова жорий йилда корхона хорижга маҳсулот етказиб бериш ҳажми қисқарганини маълум қилди.
Бекмуратованинг айтишича, қарийб 300 нафар ходим ишлайдиган корхона одатда йилига 3 миллион долларлик маҳсулот экспорт қилади. Асосий экспорт бозорлари Европа мамлакатлари ва АҚШ ҳисобланади. Бироқ, бу йил экспорт ҳажми камайган.
«Сабаби ҳаммага маълум: деярли ҳар куни Wildberriesнинг қайсидир омбори ёниб кетяпти», — деган тадбиркор.
Унинг таъкидлашича, юзага келган вазият туфайли ARTATEX компаниясида дебиторлик қарздорлиги юзага келиши мумкин. Компания 2018 йил июль ойида 3,36 миллиард сўм (тахминан 280 минг доллар) устав капитали билан рўйхатдан ўтган. Наргиза Бекмуратова корхонанинг 54,4 фоиз улушига эгалик қилади ва унинг раҳбари ҳисобланади.
Учрашувда иштирок этган Ўзбекистон Бош вазири ўринбосари Жамшид Хўжаев мазкур муаммони Wildberries раҳбарияти билан муҳокама қилганини маълум қилди. Маркетплейс вакиллари иштирокида алоҳида йиғилиш 7 август, жума кунига белгиланган.
«Жума куни Wildberries билан боғлиқ вазият юзасидан алоҳида йиғилиш ўтказамиз. Мен уларнинг раҳбарияти билан гаплашдим — улар ҳам ўз томонидан иштирок этади. [...] Бу масала бўйича тизимли ечим тайёрлаймиз», — деди Хўжаев.
Шунингдек, Бош вазир ўринбосари Марказий банк раиси ўринбосари Аброр Мирзо Олимов ҳамда Вазирлар Маҳкамаси вакили Дониёр Ғаниевга экспортчиларнинг эҳтимолий дебиторлик қарздорлиги масаласини ўрганиб чиқиш бўйича топшириқ берди.
Россия президенти Владимир Путин келтирган маълумотларга кўра, 2023 йилда Wildberries орқали Ўзбекистонда ишлаб чиқарилган маҳсулотлар савдоси ҳажми 418 миллион долларни ташкил этган. Wildberriesнинг Ўзбекистондаги директори Акмал Примқуловнинг сўзларига кўра, 2025 йилда бу кўрсаткич 1,4 миллиард доллардан ошган.
Wildberriesнинг Россиядаги логистика объектларига дронлар ҳужумлари 18 июль куни бошланган. Тамбов, Москва, Краснодар, Ленинград, Тверь, Самара, Владимир, Волгоград, Тула вилоятлари, Ставрополь ўлкаси, Удмуртия, Қрим ва Санкт-Петербургдаги омборлар ҳамда саралаш марказлари зарбага учраган. Қатор объектларда йирик ёнғинлар юз берган, айрим омборлар эса вақтинча фаолиятини тўхтатган. Ҳужумлар оқибатида компаниянинг бир нечта ходими ҳалок бўлган, камида 100 киши жабрланган. Сотувчиларга тегишли юзлаб миллиард рубллик товарлар тўлиқ ёниб кетган ёки шикастланган.
Аввалроқ, июнь ойида Wildberries Ўзбекистонда Марказий Осиё логистика хабини ташкил этиш ва мамлакат инфратузилмасини ривожлантиришга 300 миллион доллардан ортиқ инвестиция киритишни режалаштираётгани ҳақида хабар берилган эди. Лойиҳани Wildberries & Russ (РВБ) бирлашган компанияси амалга оширади. Хаб таркибига Тошкент вилоятида майдони қарийб 170 минг квадрат метр бўлган саралаш маркази ва қурилаётган омбор мажмуаси, шунингдек компания фаолият юритадиган бошқа мамлакатлардаги инфратузилма объектлари киради. Логистика хаби Марказий Осиёдан маҳсулот экспорт қилиш учун асосий марказга айланиши, «Россия–Ўзбекистон–Яқин Шарқ» йўналишини боғлаши, шунингдек «Хитой–Ўзбекистон–Африка» йўлаги орқали товарларни Африка бозорларига транзит қилишни таъминлаши кутилмоқда.
