"Ҳумо" матбуот хизмати фотосурати
1 февраль куни Тошкентнинг «Ҳумо» хоккей клуби «Ҳумо Арена»да «Мишкопад» (юмшоқ айиқча ўйинчоқларини ёғдириш) хайрия акциясини ўтказди. Бу ҳақда пойтахт хоккей клубининг матбуот хизмати хабар берди.
Акция Қозоғистон хоккей лигаси мунтазам чемпионатида финал бўлган «Ҳумо» – «Номад» (3:1) учрашувидан сўнг бўлиб ўтди.
Якуний сиренадан сўнг мухлислар ўзлари билан олиб келган юмшоқ ўйинчоқлар трибунадан муз майдонига ёға бошлади. Жами 1312 дона ўйинчоқ йиғилди, улар SMA UMID ва ISHONCH фондлари кўмагида Республика болалар ижтимоий мослашуви марказида даволанаётган оғир ирсий касалликларга чалинган беморларга юборилади.
Мунтазам чемпионат натижаларига кўра, «Ҳумо» Қозоғистон чемпионатининг плей-офф босқичига йўлланмани кафолатлади. Шунингдек, жамоанинг турнир жадвалида учинчи ўриндан пастга тушиб кетмаслик эҳтимоли юқори.
ℹ️ Ҳумо хоккей клуби 2018 йили ERIELL иштирокида ташкил этилган. Дастлабки мавсумдаёқ жамоа Ўзбекистон чемпионатининг гуруҳ босқичида ғолиб чиққан. 2019 йил баҳорида клуб ВХЛга қўшилади ва дублёр жамоа Қозоғистон чемпионатида «Ҳумо-2» номи билан эълон қилинди.
Мавсум якунида «Ҳумо-2» чемпионатда ўнинчи ўринни эгаллади. Асосий жамоа янада муваффақиятли кўринди ва Петров кубогининг чорак финалига чиқди. Бироқ, тошкентликлар коронавирус пандемияси туфайли Москванинг «Звезда» жамоасига қарши серияни якунлай олмаган.
2020 йил апрель ойида жамоа раҳбарияти COVID-19 пандемиясига қарши курашиш бўйича дунёнинг аксарият давлатларида кўрилаётган қатъий чеклов чоралари туфайли «Ҳумо» ВХЛдаги мавсумни, «Ҳумо-2» эса Қозоғистон чемпионатидаги мавсумни ўтказиб юборишини маълум қилганди. «Ҳумо» 2022 йилдан бери Қозоғистон чемпионатида иштирок этади.
