Тожикистон терма жамоаси Осиё Кубоги U-23 даги илк учрашувда мағлуб бўлди

Тожикистон футболчилари. the-afc сайти фотосурати

Тожикистон олимпия терма жамоаси Осиё Кубоги U-23 гуруҳ босқичининг биринчи турида Саудия Арабистони терма жамоасига 2:4 ҳисобида имкониятни бой берди.

Мутахассислар фикрича, айнан саудияликлар учрашувнинг фаворити ҳисобланган, бироқ асосий урғу 2022 йили ёшлар ўртасидаги Осиё кубоги доирасида ўтказилган сўнгги ўйин натижаларига қаратилган, ўшанда тожикистонликлар 0:5 ҳисобида мағлуб бўлишган. Орадан икки йил ўтган ва бу таркибдан фақат бир нафар футболчи Тожикистон терма жамоаси сафида қолган. Саудияликлар таркибида бирданига етти нафар шундай футболчи бўлган. Ўз навбатида, саккиз нафар тожикистонлик футболчи катталар ўртасидаги Осиё Кубогида ўйнаш тажрибасига эга эди ва бу муваффақиятга умид уйғотарди.

Саудиялик футболчилар ўйинни жуда фаол бошлаб, тожикистонликларни майдоннинг ўз ярмида ёпиб қўйишди. Биринчи гол 17-дақиқада саудиялик ҳимоячи Раян Ҳамиду томонидан киритилди. Аммо орадан 5 дақиқа ўтиб, биринчи қарши ҳужумда Руслан Хайлоев чиройли айлана зарбаси билан ҳисобни тенглаштирди. Саудияликлар ҳужумни давом эттирдилар ва танаффусгача муваффақиятга эришдилар. Биринчи бўлим тугашига бир неча дақиқа қолганида Хайтам Асири жамоасини олдинга олиб чиқди.

Учрашувнинг иккинчи бўлимида саудияликлар янада тажовузкор ўйнай бошлашди. Натижада Айман Яҳё беш дақиқа ичида – 55 ва 61-дақиқаларда дубл қайд этди. Саудияликлар тинчланишгандек кўринди, Рустам Соиров дарҳол ундан унумли фойдаланиб, 63-дақиқада орадаги фарқни қисқартирди. Тожикистонликлар таслим бўлмадилар ва ўйинга қайтишга ҳаракат қилишди: Соиров пеналти ишлаб олди, ҳакам VARни кўриб чиқиб, уни бекор қилди, бир қанча эҳтимолий вазиятлар яратилди, бироқ улар ўйинни ўзгартира олишмади. Ўйин 4:2 Саудия Арабистони фойдасига ҳал бўлди.

C гуруҳидаги яна бир учрашувда Таиланд Ироқни 2:0 ҳисобида мағлуб этди.

Кейинги турда 19 апрель куни Тожикистон терма жамоаси Ироққа қарши баҳс олиб боради.

Эслатиб ўтамиз, 17 апрель куни Малайзияга қарши баҳс олиб борувчи мусобақада Ўзбекистон терма жамоаси ҳам иштирок этмоқда.

15 апрелдан 3 майга қадар Қатарда Осиё Кубоги U-23 бўлиб ўтади. Турнирда 16 та жамоа, жумладан, Ўзбекистон ва Тожикистон жамоалари иштирок этмоқда. Мусобақа совриндорлари 2024 йили Парижда бўлиб ўтадиган Олимпия ўйинларига йўлланма олади. Тўртинчи энг яхши жамоа Африка вакили — Гвинея терма жамоаси билан плей-офф ўйинида яна бир йўлланма учун ўйнайди.

ШУНИНГДЕК ЎҚИНГ
  • Тошкентда ҳарбий марш бўлиб ўтди

  • Алия Назарбоеванинг рейдерлик билан боғлиқ можаро марказида қолгани ва нега бу ишни ҳеч ким тергов қилишни хоҳламаётгани ҳақида

  • Қирғизистон президенти келтирган далиллар ва халқаро ташкилотларнинг «хорижий агентлар тўғрисида»ги қонун имзоланишига муносабати

  • «Крокус Сити Холл» да содир бўлган терактдан сўнг Россияда Марказий Осиёдан келган мигрантларга нисбатан босим кучайди